بقلم /  أم سماا

كانت ايامك يا شعيبة و هادي ايامك يا شعيبة و كي دايرة ايامك الجاية يا شعيبة

هادي ماشي اغنية شعيبة هادي راه حكاية شعيبة المقهور مسكين كان راجل مزيان داره كانت هانية و عايش بخير واحد النهار هجمو ليه على داره كانوا اولاده بالمرصاد قاوموا و جاهدو ودخلات فيها حتى السياسية شوية ديال الذكاء على شوية ديال التحزار و لحيس الكابة و التنازلات قدر شعيبة يخرج المحتل من داره دازت سنين و منين  و شعيبة رجعات ليه المشاكل من جديد لكن هاد المرة ماشي من البراني مشاكله جاته من ولاده من كبدته اللي ولدهم و رباهم و علمهم و كان خيره عليهم كبير هوما تقلبو عليه بداو ينتفو و ياكلو و يخونو و يفسدو ما خلاو حتى شي حاجة خايبة ما داروها حتى شهرو بيه قدام البراني ولا معروف عند الناس ولا كلشي كيهضر عليه

شعيبة مشكلته انه الريوس ماشي مقادة كل واحد ينتف من جيهة و ما جات غير في ولاده الضعفا حيث الخبزة قسموها الريوس الكبار و حتى منين بغا يدير النظام و الديموقراطية زعما ما صدقاتش ليه شعيبة تلات بيه الزمان و تقهر حيث كلشي تخلا عليه منهم الى ما بقاش باغي  يعيش معاه فضل قوارب الموت و لا يبقى مدلول و منهم اللي ترفح و بنى الفيلات و العمارات و دار فلوس في الخارج و فيهم اللي صدقات ليه مزيان و بين يوم و ليلة ولا وزير و مستشار و فيهوم اللي قرا و حفا عينيه و كيشبع سليخ من يد المرود اللي ما قاريين والو غير العصا لمن يعصى و فيهوم اللي محارب غير مع الخبز و اتاي و الخضرة و فيهوم و فيهوم و فيهوم الحاصول راه شعيبة ما بقا فيه ما يتلبق بيني و بينكم شحال من مرة كيتنادم معاه الحال كيقول لوكان يلقا شي دلال يبيع ليه كلشي في خطرة و اللي ما عجبوش يلوحه في البحر احسن

هادا هو مختصر حكاية شعيبة المقهور الشعب المغربي …………….